HKARCHER – Bow Tuning ：唔止睇 Benz，記錄先係真正關鍵

射箭器材調整（Bow Tuning）唔係單靠技術就可以搞掂，要真正對運動員有幫助，核心係持續記錄與數據分析。今次我唔係教大家點樣 Tuning 一把弓，而係想講清楚 Tuning 嘅定義與理解。

Pre-Tune ≠ 完成品

現時流行嘅做法通常係：你交把弓比技術人員，佢幫你整理好所有部件，試打出所謂 Benz 位，然後交返比你。咁就算完成 Tuning 嗎？你收貨嗎？

坦白講，呢種做法只能叫做 Pre-Tuned，因為當中仍然存在不少誤差。

我認為用機器打 Benz 位，干擾性低，數據穩定，先可以定義為真正的 Pre-Tune。但係，是否完全否定人手 Pre-Tune 呢？唔一定，只係相對不理想，而且要注意幾個重點：

• 人為誤差容易造成誤會
• 射手習慣會影響調整結果
• 帶 Side Rod 嘅射手比較難為其他人調弓，往往會將自己感覺注入弓內，結果變成測試者的 Benz，而唔係射手的

Logbook：運動員成長的起點

作為教練或競賽型運動員，應該養成習慣，自動自覺地記錄各種數據。表面睇好似唔多，但實際工作量非常大。

Logbook係每位運動員成長的起點，而Tuning 記錄就係 Logbook 中不可或缺的一環。

每一次微調、每一個器材細節（包括弓、箭、配件、設定等）都要量度並記錄。更改後要更新數據、對比結果，並寫下更改原因。呢啲唔係一次性操作，而係持續性數據追蹤。

記錄唔單止係技術支援，更係訓練方向與計劃的依據。千祈唔好口噏噏當秘笈，講訓練又唔講記錄，咁只會走漏重點。

Benz 只係起點，飛行軌跡先係關鍵

唔好以為睇到 Benz 位就代表 Tuning 完成。Benz 只係初始標準，真正要睇嘅係箭嘅飛行軌跡。

完整的 Tuning 流程應包括：

• 初始設定
• 數據記錄
• Benz 測試
• 飛行軌跡測試（建議距離不少於 18 至 30 米，FITA 要求更高）

飛行軌跡測試先係真正調整的開始。呢部分唔容易一個人處理好，需要教練與運動員密切配合。每支箭的飛行，其實係人、弓、箭三者靈魂結合的旅程。

技術之外：人體結構同樣重要

最後一點：Tuning 唔止係技術層面，仲要配合人體結構與使用者習慣。弓是否合適，對整體表現影響極大，唔可以忽略。

 

05/05/2024